Уф!”-тимәнем. Фирүзә Абдуллина.

"Уф!”-тимәнем. (шиғыр) автор Фирүзә Абдуллина

Ижад итеү ваҡыты: 19.03.2014.. Нәшер ителгән: 12.12.2014.. Сығанаҡ: “Бәйләнештә” сайтындағы “Ғәжәп донъя” төркөмөнән.

* * *

Яҙмыш байтаҡ аяҡ салды-
Һөрлөкмәнем,
Йәштәремде йотһам – йоттом,
“Уф!”-тимәнем.

Үлем менән көрәшкәндә
Бирешмәнем,
Урттарымды сәйнәп түҙҙем,
“Уф!”-тимәнем.

Яҡындарымды ерләнем-
Бөгөлмәнем.
Йәшәр өсөн көстәр таптым,
“Уф!”-тимәнем.

Бәхетемдән көлә-илай
Йәштәр түкһәм,
Ғәйепләмәгеҙ, шатлыҡтан
“Уф!”-тип әйтһәм.

---